Matarkarfan í Bónus kostaði 16.086 krónur samkvæmt nýrri könnun sem verðlagseftirlit Alþýðusambands Íslands (ASÍ) gerði á föstudaginn. Kannað var verð í níu lágvöruverðsverslunum og stórmörkuðum á höfuðborgarsvæðinu.
Næst ódýrust var matarkarfan í Krónunni en þar kostaði hún 16.246 krónur og var hún því 1% dýrari en í Bónus. Dýrust var matarkarfan í versluninni Víði. Þar kostaði hún 19.650 krónur sem þýðir að hún var 22% dýrari en matarkarfan í Bónus.
Mesti verðmunurinn var á appelsínum. Kílóið kostaði 178 krónur í Iceland en 498 krónur í Víði sem er 180% verðmunur. Næst mesti verðmunurinn var á heilhveitibrauði eða 130%. Brauðið kostaði 249 krónur í Bónus 572 krónur í Hagkaup. Oftast var verðmunur á hæsta og lægsta verði á bilinu 25 til 50% en eins og „ oft áður er nánast engin verðmunur á nýmjólk og stoðmjólk eða 1%," segir í tilkynningu ASÍ.
Verð á matarkörfu 10. október:
- Bónus 16.086 krónur.
- Krónan 16.246 krónur (1%).
- Nettó 17.439 krónur (8%).
- Fjarðarkaup 17.532 krónur (9%).
- Iceland 17.924 krónur (11%).
- Hagkaup 18.246 krónur (14%).
- Nóatún 18.434 krónur (15%).
- Samkaup Úrval 18.799 krónur (17%).
- Víðir 19.650 krónur (22%).