Lán til framfærslu íslenskra námsmanna erlendis munu lækka um allt að 20% á næsta skólaári samkvæmt nýjum úthlutunarreglum Lánasjóðs íslenskra námsmanna, LÍN, sem tóku gildi 1. apríl. Formaður SÍNE, Sambands íslenskra námsmanna erlendis, segir í samtali við Morgunblaðið í dag niðurskurð hjá LÍN allt of lengi hafa bitnað á nemum sem sæki háskólanám erlendis.
Jóhann Gunnar Þórarinsson, formaður SÍNE, segir það furðulega þróun að skera niður framfærslulán til fólks sem er að ná sér í sérfræðiþekkingu erlendis. Segir hann jafnframt að næsta skref SÍNE sé að safna reynslusögum hjá fólki og undirskriftum og mótmæla þessum nýja niðurskurði.
Undir þetta tekur Sigrún Dögg Kvaran, sem situr í stjórn SÍNE. Segist hún ítrekað hafa reynt að fá viðbrögð frá ráðuneytinu en engin svör fengið. Sigrún tekur dæmi af hjónum með tvö börn sem bæði eru í námi í Svíþjóð. Þau eru að upplifa niðurskurð á framfærsluláni þriðja árið í röð, samanlagt 40%.
Fjallað er um fjárhagsstöðu LÍN í nýjasta tölublaði Viðskiptablaðsins.