Ekki er rétt sem fram hefur komið þess efnis að Landsbankinn hafi framselt kröfur sínar á hendur viðskiptavinum sem hafa farið í greiðsluaðlögun til annars fyrirtækis sem innheimti þær. Þar var Elsa Lára Arnardóttir, þingkona Framsóknarflokksins, sem óskaði eftir upplýsingum um málið. Í áréttingu Landsbankans segir að svar bankans við fyrirspurn Elsu hafi ekki verið nægjanlega skýrt hvað þetta varðaði. Bankinn feli vissulega innheimtufyrirtækjum að innheimta kröfur, en er eftir sem áður eigandi kröfunnar.
Áréttingin er svohljóðandi:
„Vegna frétta sem fluttar voru um síðastliðna helgi, af fyrirkomulagi á innheimtu banka og fjármálafyrirtækja og skráningar viðskiptavina sem undirgengist hafa greiðsluaðlögun, vill Landsbankinn taka fram að bankinn framselur ekki kröfur á hendur viðskiptavinum, öfugt við það sem skilja mátti af fréttum.
Svar bankans við fyrirspurn Elsu Láru Arnardóttur alþingismanns, var ekki nægjanlega skýrt hvað þetta varðaði. Bankinn felur vissulega innheimtufyrirtækjum að innheimta kröfur, en er eftir sem áður eigandi kröfunnar.
Þá er einnig rétt að fram komi að viðskiptasögu allra einstaklinga er haldið til haga og þá einnig hver sé staða þeirra úrræða sem viðkomandi er í á hverjum tíma. Kröfur eru skráðar í kerfum bankans þrátt fyrir að þær hafi verið niðurfelldar vegna afskriftar eða af öðrum ástæðum en skráning þeirra er afmáð eftir 7 ár.
Farið er með allar upplýsingar og vinnslu þeirra í samræmi við lög um persónuvernd og meðferð persónuupplýsinga nr. 77/2000, auk þess sem bankinn hefur sett sér reglur um meðferð persónuupplýsinga og meðferð þeirra sem kynntar eru starfsmönnum hans.“
