Landsbankinn telur hvorki ástæðu til né tímabært að fjalla um fyrirhugaða nýbyggingu bankans á sérstökum hluthafafundi. Þetta kemur fram í svarbréfi bankans til Vestmannaeyjabæjar, sem mbl.is greinir frá .
Vestmannaeyjabær hafði áður farið þess á leit við bankann að haldinn yrði hluthafafundur í tilefni byggingar nýrra höfuðstöðva bankans, en bærinn á hlut í bankanum.
Í bréfinu segir að fram hafi komið að núverandi húsnæðiskostur Landsbankans henti bankanum ekki, og að mikil hagræðing muni nást fram með byggingunni. Þá hafi áform bankans legið fyrir á síðustu tveimur aðalfundum bankans.
Eftir ítarlega athugun bankans hafi niðurstaðan orðið að sú lóð sem bankinn hyggst byggja á væri hagkvæmasti kosturinn.