Landsbanki Íslands hf. hefur lokið sölu á 13.643.280 hlutum í D. Carnegie & Co AB fyrir andvirði 21,8 milljarðar króna (EUR 235 m). Eignin samsvarar 19.8% af útgefnum hlutum í Carnegie Eftir þessi viðskipti á Landsbankinn enga hluti í Carnegie. Verð í viðskiptunum var 162 sænskar krónur á hlut.

Fyrir söluna átti Landsbankinn 13.643.280 hluti í Carnegie. Landsbankinn eignaðist hlutabréfin í tengslum við samruna Landsbankans við Burðarás sem tilkynntur var þann 2. ágúst 2005. Í tilkynningu bankans kemur fram að sala bréfanna er í samræmi við stefnu Landsbankans um virka stýringu á hlutabréfastöðum, innlausn hagnaðar við rétt skilyrði og áherslu á samþættingu alþjóðlegrar starfsemi bankans.

Með sölunni innleysir Landsbankinn 10 milljarða kr. (EUR 110 m) gengishagnað. Samkvæmt reikningsskilavenjum hefur eign bankans í Carnegie verið færð á markaðsvirði á hverjum tíma og því hefur salan óveruleg áhrif á afkomu bankans á öðrum ársfjórðungi þar sem gengishagnaðurinn er þegar bókaður í uppgjörum bankans fyrir árið 2005 og fyrsta ársfjórðung 2006.

Eignin í Carnegie var stærsta einstaka hlutabréfaeign Landsbankans og samsvaraði um 25% af heildareign bankans í hlutabréfum. Við söluna minnkar hlutabréfaeign Landsbankans í um 3% af heildareignum, auk þess sem eiginfjárhlutfall bankans styrkist verulega.

Sigurjón Þ. Árnason, bankastjóri Landsbankans segir í tilkynningu bankans: ?Þessi viðskipti sýna með skýrum hætti getu Landsbankans til að stýra hlutabréfaeign sinni með virkum og árangursríkum hætti og er í samræmi við þá stefnu bankans að taka þátt í arðbærum fjárfestingarverkefnum en viðhalda jafnframt viðunandi áhættustigi bankans"

Halldór J Kristjánsson, bankastjóri Landsbankans segir í sömu tilkyinningu: ?Við höfum fylgst náið með rekstri Carnegie á síðustu misserum og sterkri stöðu þeirra sem leiðandi fjárfestingarbanka á Norðurlöndum og góðum rekstrarárangri þeirra á sveiflukenndum mörkuðum. Á þessum tímamótum óskum við félaginu og starfsmönnum þess farsældar á komandi árum."

Hlutabréfin voru seld til alþjóðlegra fagfjárfesta með tilboðsfyrirkomulagi (e. accelerated bookbuilding offering). Yfirumsjón með sölunni var í höndum Deutsche Bank (e. book runner) í samvinnu við Carnegie (e. sales agent).