Landsbankinn auglýsir í dag til sölu allan eignarhlut sinn í fjárfestingarfélaginu Eyri Invest. Er um að ræða 23,3% alls hlutafjár í félaginu. Um er að ræða eina verðmætustu eignarsölu sem Landsbankinn hefur ráðist í.
Í auglýsingunni kemur fram að Eyrir Invest á 29,3% hlut í Marel hf. og 33,7% hlut í fjárfestingarfélaginu Eyrir Sprotar slhf. sem fjárfestir í nýsköpunarfyrirtækjum. Var eiginfjárhlutfall Eyris 54,5% um síðustu áramót.
Þar kemur einnig fram að söluferlið sé í „samræmi við stefnu Landsbankans um sölu eigna í eigu bankans og er öllum opið sem teljast hæfir fjárfestar" samkvæmt ákvæðum laga um verðbréfaviðskipti. Landsbankinn er sem stendur stærsti einstaki eigandi Eyris Invest. Þar á eftir koma feðgarnir Þórður Magnússon (19,6 prósent) og Árni Oddur Þórðarson (17,3 prósent). Árni Oddur er forstjóri Marel í dag en Þórður er stjórnarformaður Eyris Invest.