Landsbankinn hefur eignast allt hlutafé í verktakafyrirtækinu Björgun ehf. sem var í eigu Renewable Energy Resources ehf. (RER) dótturfyrirtækis Atorku Group hf.. Í fréttatilkynningu kemur fram að í tengslum við skuldauppgjör RER hefur bankinn leyst til sín þau veð sem bankinn átti í eigum félagsins.
„Landsbankinn hefur þegar fengið undanþágu til samruna bankans og Björgunar ehf. hjá Samkeppniseftirlitinu. Áætlað er að Landsbankinn muni selja Björgun í opnu söluferli innan 6 mánaða og verður fyrirkomulag þess kynnt þegar nær dregur. Fyrirtækjaráðgjöf Landsbankans mun annast söluna," segir í tilkynningunni.
Björgun ehf. var stofnað 1952 og er þekktast fyrir efnisnám úr sjó og er stærsti framleiðandi jarðefna til mannvirkjagerðar á Íslandi auk þess að annast framkvæmdir við dýpkun hafna. Þá hefur félagið verið í uppbyggingu bryggju- og strandhverfa hér á landi.
Um 35 manns starfa hjá Björgun og eru engar breytingar á rekstri félagsins fyrirhugaðar samkvæmt tilkynningu og er rekstur Björgunar ehf. sagður í jafnvægi. Landsbankinn mun skipa Björgun ehf. nýja stjórn til skamms tíma. Framkvæmdastjóri er Gunnlaugur Kristjánsson.