Landsnet hefur gefið út óveðtryggð skuldabréf að fjárhæð 200 milljónir bandaríkjadollara (22,9 milljarðar króna). Í fréttatilkynningu frá fyrirtækinu kemur fram að bréfin voru seld til alþjóðlegra fagfjárfesta í lokuðu útboði og munu ekki verða skráð í Kauphöll. Bréfin eru að stærstum hluta með gjalddaga eftir tíu til tólf ár og bera að meðaltali 4,56% fasta vexti. Fjármögnunin er liður í því að tryggja félaginu fjármagn á hagstæðum kjörum til lengri tíma, breyta samsetningu lána og draga úr gengisáhættu, að því er segir í tilkynningunni.
Guðmundur Ingi Ásmundsson forstjóri Landsnets segir í tilkynningunni þessa fyrstu erlendu skuldabréfaútgáfu Landsnets vera stórt skref og það sé ánægjulegt hvað fjárfestar sýndu félaginu mikið traust. Skuldabréfaútgáfan skili hagstæðari kjörum auk þess sem dregið sé úr gengisáhættu en félagið tók upp dollar sem uppgjörsmynt í ársbyrjun. Þá sé lánstíminn lengri en almennt hefur tíðkast hafi í erlendum lántökum síðustu árin.
Tilboð bárust fyrir ríflega 260 milljónir bandaríkjadollara og var ákveðið að tvöfalda útgáfuna vegna mikils áhuga fjárfesta og góðra kjara. Fjármögnunin er tekin í tveimur áföngum þar sem helmingur er greiddur núna og eftirstöðvar í mars næstkomandi. Barclays banki plc hafði umsjón með skuldabréfaútgáfunni.
