Tap Landsnets á árinu 2016 nam 13 milljónum dollara eða 1.564,7 milljónum króna. Árið áður hagnaðist Landsnet um 30,4 milljónir dollara eða því sem samsvarar 3.669,8 milljónum króna.

Rekstrarhagnaður félagsins fyrir fjármagnsliði (EBIT) nam 49,7 milljónum dollara eða tæplega 6 milljörðum samanborið við 56,8 milljónir dollara eða 6.8 milljörðum árið áður. Lækkunin er því um 7,1 milljón doll ara eða 856,5 milljónir króna á milli ára og skýrist aðallega af hækkun afskrifta.

„Unnið var að endurfjármögnun félagsins á árinu þar sem fjármögnun félagsins var að miklu leyti breytt yfir í bandaríkjadal í samræmi við nýjan starfrækslugjaldmiðil félagsins. Gefin voru út skuldabréf, 200 milljónir USD, í lokuðu skuldabréfaútboði í Bandaríkjunum í desember 2016. Greitt var inn á verðtryggt krónulán frá stærsta eiganda félagsins og eftirstöðvum skuldbreytt í bandaríkjadali. Í árslok var um 80% af fjármögnun félagsins komin yfir í bandaríkjadali samkvæmt stefnu stjórnar,“ segir meðal annars í tilkynningu frá félaginu.

Handbært fé Landsnets í lok árs nam 18,3 milljónum dollara eða 2.202 milljónum króna og handbært fé frá rekstri á árinu nam 52,4 milljónum dollara eða 6.322 milljónum króna.

Yfir í dollara

„Í byrjun árs 2016 var starfrækslugjaldmiðli Landsnets breytt og er þetta því fyrsta árið sem fyrirtækið er gert upp í bandarískum dal.  Fjármögnun félagsins var að mestu leiti í íslenskum krónum og því var niðurstaða ársins Landsneti óhagstæð vegna mikillar styrkingar krónunnar.

Á árinu var unnið að endurfjármögnun fyrirtækisins og náðist stór áfangi í þeim efnum í lok árs þegar fyrirtækið gaf út 200 milljónir USD skuldabréf í lokuðu skuldabréfaútboði fyrir fagfjárfesta í Bandaríkjunum,“ er tekið fram í tilkynningunni.

„Það er jákvætt að sjá að rekstrarhagnaður fyrir fjármagnsliði og afskriftir er góður og í takt við áætlanir. Rekstur Landsnets stendur á mjög traustum grunni og má nær eingöngu skýra tap fyrirtækisins með styrkingu krónunnar á árinu og áhrif þess á fjármagnskostnað.  Fyrirtækið var áður með um 80% af fjármögnun sinni bundna í stofnlán frá stærsta eigandanum og var lánið verðtryggt í íslenskum krónum án afborgunarheimildar til ársins 2020.  Á árinu áttu sér stað viðræðum við lánveitendur og var stórt skref stigið þegar samningar náðust um innborgun inn á stofnlánið og skuldbreytingu eftirstöðva þess í árslok  2016. Breytt fjármögnun skilar okkur hagstæðari kjörum auk þess sem dregið er úr gengisáhættu,” er haft eftir Guðmundi Inga Ásmundssyni, forstjóri Landsnets í tilkynningunni.