Landsréttur hefur staðfest úrskurð Héraðsdóms Reykjavíkur um að hafna beiðni Valitor um að dómkveðja nýja matsmenn í máli Sunshine Press Productions ehf (WikiLeaks) og DataCell gegn Valitor. Þetta kemur fram í tilkynningu frá Sveini Andra Sveinssyni, lögmanni Sunshine Press og DataCell.

Málið varðar greiðslu skaðabóta vegna ólögmætrar lokunar Valitor á greiðslugátt fyrir alþjóðleg framlög til WikiLeaks árið 2011, en hæstiréttur úrskurðaði árið 2013 að lokun Valitor á gáttinni, sem Valitor og DataCell höfðu gert með sér samning um, hafi verið ólögmæt.

Mat var gert á tjóni stefnenda, sem hljóðaði upp á 3,2 milljarða króna, en Valitor vildi ekki una því og fór fram á yfirmat. Þegar það hafði verið framkvæmt vildi Valitor hinsvegar ekki leggja það fram, og fór fram á nýtt undirmat. Þeirri kröfu var synjað af héraðsdómi, enda hafi niðurstaða legið fyrir um þau atriði sem matsbeiðnin lýtur að, ýmist í undirmati eða yfirmatinu. Þeim úrskurði héraðsdóms var áfrýjað til Landsréttar, en hann hefur nú staðfest úrskurð héraðsdóms.

Í tilkynningunni frá lögmanni Sunshine og DataCell nú í morgun er Valitor sakað um að hafa reynt að tefja málið í lengstu lög, sem er sagt sérstakt, þar sem krafan hækki um 2 milljónir á dag. Reifað er að farið hafi verið fram á kyrrsetningu eigna Valitor vegna áhyggja af fjárhagsstöðu þess, en þeirri kröfu var hafnað af sýslumanni eftir að eigendur Valitor settu 750 milljónir króna af nýju hlutafé í félagið. Synjun sýslumanns hefur verið kærð til Héraðsdóms Reykjavíkur.

Þá er Valitor sakað um að hafa gerst þáttakandi í „fordæmalausri aðför fjármálafyrirtækja gegn WikiLeaks“, sem sprottin sé af pólitískum rótum, og málið kallað „gróft alþjóðlegt samsæri“.