Landsvirkjun hefur undirritað samning um útgáfu skuldabréfs til 7 ára að fjárhæð 50 milljónir Bandaríkjadala, sem samsvarar um 6,4 milljörðum króna, í samstarfi við Arion banka.
Í tilkynningu kemur fram að bréfið muni bera 4,27% fasta vexti sem greiðast tvisvar á ári en höfuðstóll greiðist í einu lagi á lokagjalddaga. Landsvirkjun hefur heimild til uppgreiðslu að hluta eða að fullu á lánstímanum. Þar segir jafnframt að andvirði útgáfunnar verði nýtt til almennrar fjármögnunar Landsvirkjunar.
Skuldabréfaútgáfan er gerð undir EMTN (e. Euro Medium Term Note) ramma félagsins án ríkisábyrgðar og verður skráð í kauphöllinni í Luxemborg.
