Landsvirkjun hefur skilað fyrstu framvinduskýrslu sinni vegna Hnattrænna viðmiða Sameinuðu þjóðanna um samfélagsábyrgð þar sem markmiðið er að stuðla að aukinni samfélagsábyrgð fyrirtækja og stofnana, efla sjálfbærni í rekstri þeirra og stuðla að ábyrgum viðskiptaháttum. Þetta kemur fram í tilkynningu frá Landsvirkjun.
„Landsvirkjun gerðist aðili að viðmiðum UN Global Compact í nóvember 2013 en aðildin felur í sér skuldbindingu til að virða og innleiða tíu reglur um mannréttindi, vinnurétt, umhverfismál og varnir gegn spillingu. Aðilar að viðmiðunum gera árlega grein fyrir framvindu starfsemi sinnar sem snertir á þessum málaflokkum,“ segir í tilkynningunni.
Meðal þess sem kemur fram er að Landsvirkjun setji sér árlega markmið sem greint er frá á vef fyrirtækisins og í ársskýrslu ásamt því að vinna að auknu jafnrétti kynjanna.
