Lánssamningur sem Seðlabanki Íslands gerði við Íslandsbanka hf. og Arion banka hf. í kjölfar bankahrunsins fólu ekki í sér ríkisaðstoð og verðu gerðir á markaðskjörum. Þetta er niðurstaða Eftirlitsstofnunar EFTA (ESA), sem að tók málið til skoðunar eftir að kvörtun hafði borist.
Málið hefur verið til rannsóknar frá maí í fyrra og á meðan á rannsókn málsins stóð þá aflaði Eftirlitsstofnunin sér gögn varðandi lánskjör í sambærilegum lánasamningnum frá sama tíma. Gögnin sýndu að þeir lánaskilmálar sem Seðlabanki Íslands samþykkti voru í samræmi við markaðskjör þess tíma. Með samningnum var SÍ að verja hagsmuni sína og hámarka um leið endurheimtur af lánunum.
„ESA komst að þeirri niðurstöðu að umræddar ráðstafanir væru í samræmi við það sem almennur lánveitandi hefði gert í sömu stöðu. Þar af leiðandi fólu samningarnir ekki í sér ríkisaðstoð í skilningi EES-samningssins,“ segir í fréttatilkynningu frá ESA um málið.
Forsaga
Málið sem að ESA rannsakaði varðaði tvo lánsamninga milli Seðlabanka Íslands og Arion banka (áður Kaupþings) og Íslandsbanka (áður Glitnis). Þeir voru undirritaðir í september 2009 og janúar 2010. Með samningunum var skammtíma veðlánum og verðbréfalánum frá Seðlabankanum skuldbreytt í lán til langs tíma.
„Umrædd skammtíma veðlán voru á sínum tíma veitt með veði í ýmsum skuldabréfum, þar á meðal veðum í húsnæðislánasafni bankanna tveggja. Við endurfjármögnun nýju bankanna (Íslandsbanka og Arion banka), voru innlendar eignir og skuldbindingar forvera þeirra, Glitnis and Kaupþings, færðar til nýju bankanna. Þar á meðal voru skuldbindingar gagnvart Seðlabanka Íslands. Skuldir bankanna við Seðlabankann voru í formi skammtíma veðlána. Krafa um tafarlausa endurgreiðslu þeirra hefði haft veruleg áhrif á lausafjárstöðu nýju bankanna tveggja og dregið úr líkum Seðlabankans á að fá lánin endurgreidd að fullu,“ segir að lokum í tilkynningu frá Eftirlitsstofnun EFTA.
