Lára Ómarsdóttir hefur verið ráðin til Aztiq Fund, og mun sjá um samskipti við hagaðila, þar á meðal yfirvöld, fjölmiðla og fjárfesta og að byggja upp vitund á fyrirtækinu að því er fram kemur í tilkynningu.

Lára lét nýverið af störfum hjá Ríkissjónvarpinu eftir að hafa boðist starf sem var of spennandi til að hafna, samkvæmt frétt Vísis um starfslokin.

Lára á jafnframt að taka virkan þátt í að móta stefnu félagsins til framtíðar, en félagið hyggur á frekari fjárfestingar hérlendis og erlendis sem og að stækka fjárfestahópinn, sem nú þegar samanstendur af öflugum íslenskum og erlendum einstaklingum sem og alþjóðlegum fjárfestingarsjóðum.

Lára hefur starfað við fjölmiðla um árabil, sem fréttamaður, vefritstjóri og dagskrárgerðarkona bæði í útvarpi og sjónvarpi. Lára lauk B.ed gráðu í íslensku og stærðfræði árið 2004. Áður starfaði hún meðal annars sem innkaupastjóri og sem framkvæmdastjóri knattspyrnufélags. Hún hefur skrifað eina bók, Hagsýni og hamingja.

Á vef Aztiq kemur fram að stærstu eignir Aztiq Fund séu hlutir í systurfélögunum Alvogen og Alvotech og fasteignafélaginu Sæmundi, sem á fasteignir Alvogen og Alvotech í Vatnsmýrinni. Í tilkynningunni kemur fram að félagið hafi verið „verið virkur langtímafjárfestir hérlendis og erlendis, meðal annars í fasteignum, lyfjaiðnaði, heilsueflingu og menningarauði.“

Aztiq Fund er jafnframt stór hluthafi í Þorpinu – vistfélagi í samstarfi við Reykjavíkurborg og stendur að uppbyggingu hátækniseturs í Vatnsmýri.

Þá sé félagið í eigu öflugra íslenskum og erlendum einstaklinga sem og alþjóðlegra fjárfestingarsjóða. Fram til þessa hafa  fjárfestingar Árna Harðarsonar aðstoðarforstjóra Alvogen, Róberts Wessman, forstjóra Alvogen, og viðskiptafélaga þeirra verið í nokkrum félögum sem innihalda nafnið Aztiq.

„Það er okkur sönn ánægja að fá Láru til starfa í Aztiq,“ segir Árni Harðarson stjórnarmaður hjá Aztiq Fund.

„Með því stígum við mikilvægt skref í þá átt að sameina fjárfestingar eigenda undir einum hatti og skapa þannig öflugt fjárfestingafélag sem mun verða virkur þátttakandi í uppbyggingu atvinnulífs og auðugs samfélags á Íslandi. Ég er sannfærður um að víðtæk reynsla Láru af fjölmiðlum muni nýtast í vitundaruppbyggingu félagsins og í samskiptum við hagaðila,“ segir Árni.