Hagnaður Domino‘s Pizza Group, alþjóðasamsteypu Domino‘s, dróst saman um 10% á fyrri helmingi ársins og nam tæpum 42 milljónum sterlingspunda. Hlutabréfaverð lækkaði um sama hlutfall, og hefur ekki verið lægra í tæpt ár. Helsta ástæða versnandi afkomu er hærri kostnaður í Noregi. Reuters segir frá .
Domino‘s rekur 34 útibú í Noregi og til stendur að opna fleiri. Velta þeirra næstum þrefaldaðist, en launakostnaður óx enn hraðar. Framkvæmdastjóri flatbökukeðjunnar, David Wild, sagðist þó búast við batnandi afkomu á seinni hluta ársins.
„Velta sölustaða okkar erlendis heldur áfram að batna, en það hefur tekið okkur tíma að fínpússa reksturinn og ná kostnaði niður, sérstaklega í Noregi.“ sagði Wild, en höfuðstöðvar keðjunnar eru í Bretlandi.
Góð afkoma í Bretlandi bætti þó að einhverju leyti upp fyrir erfiðleikana erlendis, en félagið er með tæplega helmings markaðshlutdeild heima fyrir.
