Ekki stendur steinn yfir steini í fullyrðingum Eflingar um að „launaþjófnaður" sé sé stórt, mikið og vaxandi vandamál, að því er fram kemur í aðsendri grein Þórarins Ævarssonar, eiganda og stofnanda Spaðans, í Morgunblaðinu í dag.
Í skýrslu Eflingar kemur meðal annars fram að á síðasta ársfjórðungi 2020 hefðu orðið til 56 launakröfur vegna vangoldinna launa á rúmlega 40 fyrirtæki, samtals að fjárhæð 46 milljónir.
Bendir Þórarinn á að við fyrstu sýn virðist upphæð og fjöldi tilfella há, en við nánari skoðun sé það ekki tilfellið. Miðað við reikniforsendur Þórarins að hlutfall „launaþjófnaðar" af launum sé um 0,15% og að 1 af hverjum tæplega 500 félagsmanna Eflingar hafi þurft að ganga á eftir launagreiðslum með þessum hætti. Þá bendir hann á að tíðni meðal fyrirtækja sé hverfandi, enda skipta þau þúsundum og því ljóst að nær öll fyrirtæki séu með þessi mál í lagi.
Útreikningar Þórarins benda til þess að fjárhæðir „launaþjófnaðar" hafi staðið í stað síðustu fimm ár, á meðan laun hafa hækkað um um það bil þriðjung á sama tímabili. Því virðist sem svo að um verulegan samdrátt sé að ræða og bendir hann á að í raun sé stórmerkilegt að málum tengdum vangoldnum launum skuli ekki hafa fjölgað verulega í heimsfaraldrinum.
Spyr sig hvort Efling sé í verkalýðsbaráttu eða pólitík
Spyr hann hvort ekki væri nær að Efling fjallaði um þann árangur sem hefði náðst, sér í lagi miðað við erfiðar aðstæður á vinnumarkaði.
„Maður veltir fyrir sér þeirri óþægilegu spurningu, hvað vaki fyrir þeim sem veita félaginu forystu að senda frá sér svona villandi upplýsingar, en það er engu líkara en það sé verið að reyna að efna til ófriðar. Er ekki hægt að gera þá lágmarkskröfu á forsvarsmenn eins stærsta verkalýðsfélags Íslands að þeir reyni í það minnsta að námunda sig við sannleikann í stað þess að fabúlera út í loftið og draga ályktanir sem ganga þvert gegn þeim gögnum sem þeir eru að kynna? Hér tala tölurnar sínu máli og það stendur ekki steinn yfir steini, en menn fara vísvitandi með með fleipur og ásakanir. Maður hlýtur því að spyrja sig hvort þetta fólk sé í verkalýðsbaráttu, eða hvort það sé í pólitík," skrifar Þórarinn.