Ekki er víst hvort samningar við kröfuhafa um uppgjör á þrotabúum gömlu bankanna, snjóhengjuna og hvort afnám gjaldeyrishafta skili ríkissjóði eða Seðlabankanum umtalsverðum fjármunum, segir Gylfi Magnússon, dósent við viðskiptafræðideild Háskóla Íslands og fyrrverandi viðskipta- og efnahagsráðherra. Hann skrifar m.a. um kosningaloforð í aðsendri grein í Fréttablaðinu í dag. Þar segir hann fyrirheit um eignaupptöku, afturvirka skattlagningu og þvíumlíkt merkingarlaus af þeirri einföldu ástæðu að auðvelt væri að verjast slíku með aðstoð dómsstóla. Gylfi varar við flatri lækkun á húsnæðisskulda þar sem hún myndi að stærstum hluta renna til hátekjufólks á höfuðborgarsvæðinu. „Það er hins vegar vandinn ekki mestur,“ segir Gylfi.
„Það myndi engu skila nema margra ára töf. Skiptir þá engu þótt e.t.v. sé hægt að magna upp andúð á andlitslausum útlendingum meðal almennings, m.a. líkja þeim við hræfugla,“ skrifar Gylfi en grein hans heitir: Nýting skógarfugla.
Þá segir Gylfi að skili samningar einhverju þá sé ekki sjálfgefið hvernig á að verja því.
„Þar skipta sömu sjónarmið máli og þegar fjallað er um aðrar tekjur ríkissjóðs. Hægt er að verja þeim til að bæta heilbrigðiskerfið, menntakerfið, vegakerfið o.s.frv., lækka skatta eða lækka skuldir hins opinbera. Svo er auðvitað hægt að lækka skuldir tiltekinna þjóðfélagshópa eins og ýmsir leggja nú til,“ skrifar hann er varar á sama tíma við því að flöt lækkun húsnæðisskulda er mjög ómarkviss og ósanngjörn nýting opinberra fjármuna.
Leiðrétta á lán lág- og meðaltekjufólks
„Hún rennur eðli máls skv. að stærstum hluta til hátekjufólks á höfuðborgarsvæðinu. Þar eru skuldirnar mestar. Þar er hins vegar ekki vandinn mestur. Standi pólitískur vilji til þess að nota almannafé til að taka enn frekar á vanda skuldsettra heimila sem urðu illa úti í sviptingum undanfarinna ára væri mun markvissara og eðlilegra að gera það með aðgerðum sem styddu þrengri hóp, sérstaklega eignalítið lág- og meðaltekjufólk sem keypti sitt fyrsta húsnæði á árunum 2004 til 2008. Sá hópur varð verst úti vegna húsnæðisbólunnar.“
