Mikil tilfærsla hefur verið á eignum lífeyrissjóðanna úr erlendum eignum yfir í verðtryggð skuldabréf með íbúðaveði. „Séu íbúðabréf, húsnæðisbréf, húsbréf og sjóðfélagalán lífeyrissjóðanna lögð saman og borin saman við erlendar eignir sjóðanna má sjá að hlutfall þessara tveggja eignaflokka var lengst af svipað frá miðjum síðasta áratug, þótt fyrrnefndi eignaflokkurinn hafi tekið forystusætið af hinum síðarnefnda í kjölfar alþjóðlegu efnahagskreppunnar undir árslok 2008," segir í fréttum greiningar Íslandsbanka.
Þar segir jafnframt:
Nú er hins vegar svo komið að verðtryggð skuldabréf með íbúðaveði nema tæplega 750 mö.kr. í bókum lífeyrissjóðanna, en erlendar eignir þeirra nema 483 mö.kr. Veruleg breyting í þessa átt varð á vordögum í fyrra þegar lífeyrissjóðirnir eignuðust í svokölluðum Avens-viðskiptum talsverðan hluta útistandandi íbúðabréfa og greiddu fyrir með gjaldeyri sem aflað var með sölu erlendra eigna. Lífeyrissjóðirnir eru því beint eða óbeint lánardrottnar tæplega tveggja þriðju hluta verðtryggðra skulda íslenskra heimila.
Marinó Örn Tryggvason, forstöðumaður eignastýringar fagfjárfesta í Arion banka, sagði á fundi í morgun að mikil eftirspurn eftir verðtryggðum verðbréfum, meðal annars vegna fjárfestingaþarfa lífeyrissjóða, myndi ávöxtunarkrafan líklega lækka enn meira en verið hefur. Lífeyrissjóðum er gert að ná 3,5% raunávöxtun á ári.
