Bakkastakkur, félag í eigu lífeyrissjóða og Íslandsbanka, hefur eignast 34,6% af almennu hlutafé kísilvers PCC á Bakka við Húsavík eftir að gengið var frá fjárhagslegri endurskipulagningu í apríl síðastliðnum. Bakkastakkur átti fyrir 13,5% forgangshlutafé í PCC á Bakka á móti 86,5% hlut þýska móðurfélagsins PCC SE. Þetta kemur fram í ársreikningi Bakkastakks.

Fjárhagslega endurskipulagningin fól í sér að Bakkastakkur umbreytti víkjandi skuldabréfi að fjárhæð 86,7 milljónir dala, eða um 11,9 milljarðar króna á gengi dagsins, og 13,5% forgangshlutafé sínu í 34,6% af almennu hlutafé og hluthafalán að fjárhæð 9,1 milljón dala, eða um 1,3 milljarðar króna.

Sjá einnig: Breyta láni í hlutafé á Bakka

Fram kemur að ýmsir skilmálar fylgi hluthafaláninu og eignarhlutum, m.a. að réttur til arðgreiðslna er skertur um 25% þar til ákveðnum viðmiðunum er náð og tengist það samningum við lánveitendur og hluthafa PCC BakkiSilicon hf.