Lífskjör almennings fara enn versnandi þremur árum eftir hrun. Hagvöxtur er alltof lítill og miklu minni en forsendur eru fyrir. Ástæðan er sú að stjórnvöld standa í vegi fyrir aukinni verðmætasköpun. Þetta var meðal þess sem fram kom í setningarræðu Bjarni Benediktssonar, formanns Sjálfstæðisflokksins á landsfundi flokksins.

Bjarni sagði uppskeruna af ráðleysi og rangri stefnu ríkisstjórnarinnar vera þá að heimilin hafi orðið fyrir hruni á hverju einasta ári frá því að hún tók við völdum í febrúar 2009. Staðan í efnahagsmálum sé grafalvarleg. Verðbólga fari vaxandi, gjaldþrotum fjölgi,skattbyrði aukist stöðugt, samkeppnishæfni þjóðarinnar hafi hrunið og ríkisfjármálin séu í algjörum ólestri.