*

föstudagur, 21. janúar 2022
Erlent 11. janúar 2022 18:02

Líkamsræktarkeðja tapar 75 milljörðum

Líkamsræktarkeðjan Virgin Active, sem rekur 238 stöðvar víðsvegar um heiminn, tapaði 584 milljónum dala árið 2020 eða 75 milljörðum króna.

Ritstjórn
Sir Richard Branson stofnaði Virgin Active árið 1997.
epa

Líkamsræktarkeðjan Virgin Active tapaði 584 milljónum dala á árinu 2020 eða um 75 milljörðum króna. Þetta kemur fram í grein hjá The Times.

Virgin Active fór í gegnum fjárhagslega endurskipulagningu í fyrra til að bæta fjárhagslega stöðu félagsins og vernda störf, en líkamsræktarkeðjan var stofnuð árið 1997. 40 stöðum var lokað í Bretlandi í fimm mánuði sem leiddi til þess að tekjur drógust saman um 60% og meðlimum um 30%.

Keðjan rekur 238 líkamræktarstöðvar víðsvegar um Evrópu, Asíu og Suður-Afríku, en meðlimum keðjunnar í heiminum fækkaði um 20% á árinu 2020, úr 1,16 milljónum í 931 þúsund. Jafnframt drógust tekjur keðjunnar saman um 51% niður í tæpa 300 milljón dali. Tap félagsins fór úr 27 milljónum dala upp í 584 milljónir dala, eða um 75 milljarða króna.

Jo Hartley, fjármálastjóri Virgin Active, segir að það muni taka tíma að byggja aftur upp meðlimafjöldann hjá líkamsræktarkeðjunni.

Stikkorð: Virgin Active