Warren Buffett, einn ríkasti maður heims, líkir þeim milljónum reynslulausra fjárfesta sem hafa flætt inn á hlutabréfamarkaðinn undanfarið ár við fjárhættuspilara. Þá líkir hann gjaldfrjálsum miðlurum á netinu, á borð við Robinhood, við spilavíti, að því er Reuters greinir frá.
Á ársfundi Berkshire Hathaway, félaginu sem hann stýrir, sagði Buffett að Robinhood laði að sér í stórum stíl fólk sem aðeins sé að veðja á skammtímahækkanir á hlutabréfum í fyrirtækjum líkt og Apple.
„Það er ekkert ólöglegt eða siðlaust við þetta, en ég tel að ekki sé hægt að byggja samfélag í kringum fólk sem ber sig svona að," sagði Buffett á fundinum.
Viðskiptafélagi hans til langs tíma, Charlie Munger, tók dýpra í árina. „Það er hræðilegt að þessi þróun sem hefur átt sér stað geti komið niður á fjárfestingum siðlegra og sæmandi borgara," sagði hann og bætti við: „Þetta er svo rangt. Við viljum ekki afla okkur fjár með því að selja hluti sem eru slæmir fyrir almenning."
Buffett sagði að þrátt fyrir að líkurnar á að græða á hlutabréfaviðskiptum og afleiðum séu meiri en að vinna í lottói, myndu nýir fjárfestar hagnast mest á því að fjárfesta til langs tíma í burðugum og traustum fyrirtækjum.
