*

fimmtudagur, 25. febrúar 2021
Innlent 17. febrúar 2021 09:02

Ljúka fjármögnun og flytja skrifstofur

NeckCare hefur lokið 120 milljón króna fjármögnun. Fyrirtækið hefur að auki flutt skrifstofur sínar í Urðarhvarf 14.

Ritstjórn
NeckCare teymið.
Aðsend mynd

NeckCare hefur lokið 120 milljón króna fjármögnun. Þátttakendur í hlutafjárútboðinu er blanda af núverandi hluthöfum og nýjum, en Arcur ehf. aðstoðaði félagið við hlutafjáraukninguna. Er fjármögnuninni ætlað að styrkja sölu og markaðsstarf, auk þess að styðja við vöruþróun fyrirtækisins.

Samhliða hlutafjáraukningunni flutti fyrirtækið í nýtt húsnæði að Urðarhvarfi 14 í Kópavogi, en í húsnæðinu er tengd starfsemi líkt og heilsugæsla og sjúkraþjálfun.

Sjá einnig: Vekja athygli stórfyrirtækis Vestanhafs og Spara heilbrigðiskerfum heims milljarða

„Það var sérlega ánægjulegt að sjá næstum alla núverandi hluthafa félagsins taka þátt í hlutafjáraukningu og virkilega ánægjulegt að sjá nýja hluthafa bætast í hluthafahópinn. Vörur NeckCare hafa nú verið notaðar á Íslandi með mjög góðum árangri. Reynsla heilbrigðisstarfsmanna af vörum félagsins sýnir að árangur í meðferð sjúklinga er mjög mikill og mælanlegur og sýnir að með notkun búnaðarins næst umtalsvert betri mælanlegur árangur.

Það eitt að geta mælt hreyfigetu í hálsi og í framhaldi að ákveða meðferðarúrræði að viðbættu því og setja sjúklingum skýr markmið sem byggð er á hlutlægum mælingum hjálpar sjúklingum okkar gríðarlega í erfiðu og mikilvægu bataferli sem oftast er fylgifiskur hálsáverka.  Það er því gríðarlega ánægjulegt fyrir okkur að sjá að eftir þrotlausar rannsóknir, einkaleyfisvernd og umfangsmikla vöruþróun sé varan okkar að skila sér í aukinni vellíðan og bættum lífsgæðum," segir Þorsteinn Geirsson, framkvæmdastjóri NeckCare.

Um Neckcare:

NeckCare er íslenskt fyrirtæki sem selur veflægar greiningar- og endurhæfingarlausnir á hreyfiskaða í hálsi á alþjóðlegum heilbrigðistækni mörkuðum. Hátæknivörur NeckCare eru einkaleyfisverndaðar í þremur heimsálfum. Fyrirtækið þróar hátæknibúnað til hlutlægs mats á stoðkerfisvanda í hálsi sem nýtist jafnt til greiningar, endurhæfingar og fjarendurhæfingar. 

Stikkorð: NeckCare