*

fimmtudagur, 27. janúar 2022
Innlent 20. mars 2020 14:51

Loftleiðir sækja strandaða Þjóðverja

Boeing 767 vél í rekstri Icelandair mun í dag flytja stóran hóp af þýskum ferðamönnum heim frá Mexíkó.

Ritstjórn
Hér má sjá eina af Boeing 767 vélum Icelandair en þær taka 262 manns í sæti.
Haraldur Guðjónsson

Flugvél og áhöfn frá Icelandair mun í dag sækja um 260 þýska ferðamenn til Mexíkó og koma þeim heim til Þýskalands. Samkvæmt Ásdísi Ýr Pétursdóttur, upplýsingafulltrúa Icelandair Group er um að ræða leiguflugsverkefni á vegum Loftleiða, dótturfélags Icelandair Group. 

Þýski hópurinn sem verið er að sækja var staddur í skemmtisiglingu úti fyrir ströndum Mexíkó sem lauk fyrr en áætlað var vegna útbreiðslu COVID-19. Hópurinn var á vegum þýskrar ferðaskrifstofu sem hefur verið viðskiptavinur Loftleiða. 

Boeing 767 flugvél Icelandair með fullri áhöfn lagði af stað til Mexíkó í gær og mun halda aftur til Evrópu í dag. Vélin tekur 262 manns í sæti og verður því full. Vélin mun lenda fyrst á Íslandi þar sem skipt verður um áhöfn og mun hún svo halda áleiðis til Frankfurt.

Stikkorð: Icelandair Loftleiðir