Aðalmeðferð í máli sérstaks saksóknara gegn Sigurjóni Árnasyni, fyrrverandi bankastjóra Landsbankans, og undirmönnum hans í bankanum stendur enn yfir. Samkvæmt ákæru eru þeir sakaðir um að hafa með kauphallarviðskiptum handstýrt verði hlutabréfa í bankanum á skipulagðan hátt.
Sigurður Guðni Guðjónsson, lögmaður Sigurjóns, sagði í ræðu sinni nú eftir hádegi að hann hefði varið 2.200 vinnustundum í málið. Það þýði að reikningur Sigurjóns sé kominn í 46 milljónir króna fyrir utan virðisaukaskatt.
Sigurjón hefur frá upphafi lýst yfir sakleysi sínu og krefst þess að hann verði sýknaður af öllum kröfum ákæruvaldsins í málinu.
