Hugbúnaðarfyrirtækið LS Retail hélt á föstudag hóf fyrir Rögnu Ingólfsdóttur Ólympíufara í húsakynnum sínum í Höfðatúni. Ragna keppti eins og kunnugt er í badmintoni á Ólympíuleikunum í London. LS Retail hefur styrkt Rögnu fjárhagslega um eina milljón króna síðan í desember í fyrra vegna undirbúnings hennar fyrir Ólympíuleikana. Ragna var heiðursgestur hjá LS Retail og mætti ásamt unnusta sínum og starfsfólki fyrirtækisins í hófið. Fyrirtækið er jafnframt styrktaraðili íslenska kvennalandsliðsins í handbolta.
Fram kemur í tilkynningu frá LS Retail þar sem hófinu er lýst að Magnús Norðdahl, forstjóri LS Retail, byrjaði á því að óska Rögnu innilega til hamingju með frábæran árangur og lauk lofsorði yfir hve gott fordæmi hún hefði sýnt á glæstum ferli sínum með því að láta ekkert stöðva sig í að ná settum markmiðum þrátt fyrir mótlæti á köflum. Hann afhenti svo Rögnu styrk frá starfsfólki LS Retail sem vildi verðlauna Rögnu fyrir árangur hennar á Ólympíuleikunum, en einnig til að aðstoða hana við að hefja nýtt líf án badmintonspaðans. Ragna tilkynnti eftir sinn síðasta leik í London, að hún væri hætt keppni og stefni á háskólanám í Bandaríkjunum.
Ragna þakkaði fyrir stuðninginn og sagði hann hafa gert sér kleift að einbeita sér alfarið að æfingum og þátttöku í undankeppnum án þess að hafa peningaáhyggjur. Ragna gaf síðan starfsfólki LS Retail áritaða mynd af sér frá Ólympíuleikunum.
Hér má sjá myndir úr hófi LS Retail.
Ragna Ingólfsdóttir gaf LS Retail áritaða mynd af sér á Ólympíuleikunum í London.
Ragna Ingólfsdóttir og Magnús Norðdahl.
Ragna vígir veitingarnar í boði LS Retail ásamt forstjóranum Magnúsi Norðdahl.
Starfsfólk LS Retail í boðinu. Það styður Rögnu áfram.