*

fimmtudagur, 14. nóvember 2019
Fólk 15. október 2019 10:02

Magnús nýr forstjóri Kauphallarinnar

Magnús Harðarson tekur við sem forstjóri Kauphallarinnar af bróður sínum Páli Harðarsyni.

Ritstjórn
Magnús Harðarson.
Aðsend mynd

Kauphöll Nasdaq á Íslandi hefur tilkynnt að Magnús Harðarson hafi verið skipaður nýr forstjóri Nasdaq Iceland. Magnús mun hefja störf nú þegar og tekur við starfinu af tvíburabróður sínum, Páli Harðarsyni, sem tók við starfi fjármálastjóra evrópskra markaða hjá Nasdaq í byrjun mánaðar.     

Magnús hefur starfað hjá Nasdaq síðan 2002, fyrst sem forstöðumaður viðskiptasviðs og síðar sem forstöðumaður sölu og þjónustu. Hann hefur að auki verið staðgengill forstjóra Nasdaq Iceland frá árinu 2011.

„Við þekkjum mjög vel til starfa Magnúsar enda höfum við fengið að njóta krafta hans í framkvæmdastjórn Nasdaq Iceland í mörg ár.",  sagði Arminta Saladziene, Vice President, Head of Post Trade Securities Services hjá Nasdaq. „Magnús hefur gríðarlega mikla þekkingu á efnahagslegu umhverfi og reynslu  á fjármálamarkaði  sem er nauðsynlegt veganesti fram veginn, en hann hefur gegnt stóru hlutverki í uppbyggingu verðbréfamarkaðar á Íslandi. Við erum viss um að þekking hans og hugmyndir um áframhaldandi vöxt markaðarins eigi eftir að verða verðbréfamarkaði og atvinnulífi til góðs og hlökkum til að vinna með honum áfram í nýju starfi."

Magnús er fæddur árið 1966. Áður en hann hóf störf hjá Nasdaq Iceland, þá Kauphöll Íslands, var hann hagfræðingur hjá Þjóðhagsstofnun í þrjú ár og þar áður starfaði hann sem efnahagslegur ráðgjafi. Hann hefur Ph.D. gráðu í hagfræði frá Yale University.