Líkt og Viðskiptablaðið greindi frá í síðustu viku hefur efnahagsbrotadeild lögreglustjóra hætt rannsókn á meintum auðgunarbrotum Friðjóns Þórðarsonar, Haralds Þórðarsonar og Matthíasar Ólafssonar. Málið tengdist gjaldmiðlaviðskiptum og hófst rannsókn í nóvember 2008. Sakborningum í málinu var tilkynnt þann 13. febrúar sl. að fallið hefði verið frá rannsókn.
Í svari ríkislögreglustjóra við fyrirspurn Viðskiptablaðsins um málið segir að ekki þyki tilefni til að halda rannsókn málsins áfram. Í svarinu segir: „Ríkislög reglustjóri hefur unnið að rannsókn umrædds máls er varðar ætluð auðgunarbrot og peningaþvætti vegna gjaldeyrisviðskipta. Að svo komnu máli þykir ríkislögreglustjóra ekki tilefni til að halda rannsókn málsins áfram með vísan til 4. mgr. 52. gr. laga um meðferð sakamála nr. 88/2008. Hins vegar hefur ríkislögreglustjóri sent málið Fjármálaeftirlitinu til yfirferðar og eftir atvikum frekari meðferðar með vísan til laga um verðbréfavið skipti nr. 108/2007.“
Nánar er fjallað um málið í nýjasta tölublaði Viðskiptablaðsins. Áskrifendur geta nálgast blaðið hér að ofan undir Tölublöð.