Hagnaður PwC á reikningsárinu til júní 2011 var langt fyrir neðan það sem gengur og gerist meðal stóru endurskoðunarfyrirtækjanna. Hann nam aðeins um 10,3 milljónum króna af 1.536,2 milljóna króna veltu. Til samanburðar var hagnaður KPMG um 408 milljónir af 3.357 milljóna króna veltu og hagnaður Deloitte nam 300,8 milljónum af 3.077,9 milljóna króna veltu. Það var því lítið til skiptanna meðal hluthafa PwC það árið.
Friðgeir Sigurðsson, framkvæmdastjóri PwC, segir að fyrirtækið hafi undanfarið þurft að eyða bæði tíma og fjármunum í að verja sig fyrir dómstólum. „Við erum hins vegar ekki eina fyrirtækið sem er í þessari stöðu eftir bankahrun.“ Hann segir ómögulegt að fjölyrða um hvort eða þá að hve miklu leyti dómsmálin hafi haft áhrif á hagnað fyrirtækisins. Málarekstur Glitnis gegn PwC hafi kostað fyrirtækið mikið, en málinu var vísað frá dómi. „Þessi kostnaður hljóp á tugum milljóna króna. Brugðumst við þannig við að lýsa kröfu í þrotabúið vegna tjónsins og erum reiðubúin að láta reyna á rétt okkar fyrir dómstólum.“
