63% stjórnarmanna í lífeyrissjóðum hafa sinnt starfinu í þrjú ár eða skemur en 18% stjórnarmanna hafa verið sjö ár eða lengur í stjórninni. Þetta kemur fram í stjórnendakönnun KPMG og félagsvísindasviðs Háskóla Íslands.
Stjórnarmenn lífeyrissjóða skera sig úr að þessu leyti en til samanburðar má nefna að 36% stjórnarmanna hjá framleiðslufyrirtækjum hafa skipað stjórnirnar þrjú ár eða skemur og 47% stjórnarmanna þjónustufyrirtækja.
Fjármálafyrirtæki og vátryggingafélög skipast í flokk með lífeyrissjóðunum og hafa 90% stjórnarmanna í slíkum fyrirtækjum verið þrjú ár eða skemur í stjórn.
Athygli vekur að fáir stjórnarmenn lífeyrissjóða hafa ákveðið að gefa kost á sér til áfram haldandi stjórnarsetu, eða aðeins um 28% kvenna og 33% karla, og er það mun minna en í öðrum fyrirtækjum. Margir segjast þó enn óákveðnir.