„Við höfum fengið mjög margar umsóknir, og almennt góð viðbrögð við starfsauglýsingum okkar,“ segir Hjördís Árnadóttir, sviðsstjóri ytri samskipta hjá Actavis, en félagið tilkynnti á dögunum að verksmiðja félagsins í Hafnarfirði yrði stækkuð og ráðið í 50 ný störf á árinu.
Að auki hefur Actavis nýlega auglýst 20 sérfræðistörf þar sem algengast er að bakgrunnur starfsmanna sé verkfræðieða lyfjafræðimenntun. Hjördís segir áhuga á störfunum vera mikinn og starfsmannasviðið sé nú að vinna úr umsóknum. Eftir stækkun verksmiðjunnar mun hún geta framleitt 1,5 milljarða taflna á ári en miðað við núverandi afköst getur verksmiðjan framleitt milljarð taflna.