*

þriðjudagur, 30. nóvember 2021
Erlent 4. nóvember 2011 16:53

Markaðir vonsviknir með árangurinn af G20 fundinum

Ákveðið að styrkja AGS, en ekkert samkomulag náðist um hvernig það eigi að gerast.

Ritstjórn
Barack Obama sótti fundinn fyrir hönd Bandaríkjanna,
Gunnhildur Lind Photography

Leiðtogum G20 ríkjanna svokölluðu tókst ekki að ná samkomulagi um hvernig eigi að auka völd Alþjóðagjaldeyrissjóðsins svo sjóðurinn geti tekist á við skuldavanda evrusvæðisins. Voru leiðtogarnir sammála um að nauðsynlegt sé að auka völd og áhrif AGS, en það var ekki nóg til að samkomulag næðist um leiðina að því markmiði.

Í frétt Guardian segir að fundur G20 ríkjanna í Cannes í Frakklandi hafi fallið í skuggann af áframhaldandi pólitísku argaþrasi í Grikklandi og áhyggjum af Ítalíu, sem samþykkti aðstoð AGS við að koma ríkisfjármálum þar í landi í samt lag. Mjög óvenjulegt er að eitt stærsta hagkerfi heimsins þurfi að leita aðstoðar AGS, en hún mun felast í eftirliti og ráðgjöf, en ekki beinni fjárhagslegri aðstoð.

Bandaríkin taka ekki þátt

Skortur á ítarlegri útlistun á því hvernig auka eigi völd gjaldeyrissjóðsins hafði slæm áhrif á fjárfesta og lækkuðu hlutabréfavísitölur í kjölfarið og ávöxtunarkrafa á ítölsk ríkisskuldabréf hækkaði enn á ný og hefur slegið enn eitt metið.

Það eina sem kom út úr fundinum var samkomulag um að AGS eigi að vinna að því næstu þrjá mánuði að koma á sérstökum reikningi, sem nota eigi til að aðstoða við lausn á skuldavanda evrusvæðisins. Þau ríki, sem telja að Evrópa eigi að leysa sín vandamál hjálparlaust, þurfa ekki að greiða inn á þennan reikning, en í þeim hópi ber að nefna Bandaríkin. Önnur ríki, eins og Brasilía og Rússland, sem hafa lýst áhuga sínum á að hjálpa evrusvæðinu, munu hins vegar geta lagt sitt af mörkum.

Stikkorð: AGS Barack Obama G20