Það segir meira en mörg orð um markaðsaðstæður að það heyri til tíðinda takist fyrirtækjum að sækja sér fé með útgáfu skuldabréfa. Breska blaðið Financial Times gerði það að umfjöllunarefni á dögunum að nokkrum fyrirtækjum hefði tekist að gefa út skuldabréf sem eru verðlögð með gamla hættinum: Það er að verðlagningin studdist við þær upplýsingar sem er að finna á eftirmarkaði. Ástæða þess að þetta þykir heyra til tíðinda er sú að í rúmt ár hafa fyrirtæki kosið að miða verðlagningu á skuldabréfum við skuldatryggingaálag í stað þess að miða við verð á eftirmarkaði. Þessi þróun er rakin til þess að mun meiri viðskipti eru með skuldatryggingarálag en skuldabréf á eftirmarkaði og því töldu fjárfestar að það gæfi betri mynd af undirliggjandi áhættu og væri þar með besta viðmiðið varðandi verðlagningu í tengslum við útgáfu nýrra skuldabréfa. Nú þegar fjármálabólan sem myndaðist vegna auðvelds aðgengis að ódýru lánsfé er sprungin er komið annað hljóð í strokkinn. Eins og fram kemur í umfjöllun Financial Times þá hafa bankar og fjármálastofnanir tekið að vinda ofan af stöðum sínum í skuldabréfavafningum sem innihalda eitruð veð og gera það með því að kaupa skuldatryggingar í miklum mæli. Margir sérfræðingar vilja meina að þetta sé helsta ástæða þess að nánast engin tengsl virðast vera á milli verðlagningar skuldatrygginga um þessar mundir og undirliggjandi áhættu þeirra fyrirtækja sem þær tengjast. Hið háa skuldatryggingaálag er einn af þeim þáttum sem hafa gert það að verkum að lánsfjármarkaðir hafa nánast lokast.
Nánar er fjallað um málið í Viðskiptablaðinu í dag. Áskrifendur geta lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .
