Tímabært gæti verið fyrir Bandaríkjamenn að safna börtum og taka fram gömlu Peter Frampton-plöturnar. Ef marka má verðþróun á verðbréfamörkuðum undanfarnar vikur búast fjárfestar við verðbólgukreppu (e. stagflation) þar vestra líkt og gerðist á áttunda áratugnum.
Á undanförnum vikum hefur gengi hlutabréfa lækkað í Bandaríkjunum og á sama tíma hefur ávöxtunarkrafa á ríkisskuldabréfum hækkað. Jafnframt hefur heimsmarkaðsverð á hrávörum haldið áfram að hækka. Yfirleitt er neikvætt samband á milli hlutabréfa og skuldabréfa en þegar verð á bæði hlutabréfum og skuldabréfum lækkar samtímis endurspeglar það væntingar um samdrátt í efnahagslífinu og vaxandi verðbólgu.
Gengi hlutabréfa lækkar vegna væntinga um tekjusamdrátt fyrirtækja og skuldabréf falla í verði vegna verðbólguþáttarins. Þrátt fyrir að sérfræðingar hafi hugsanlega ofmetið þátt spákaupmanna í hækkandi heimsmarkaðsverði á hrávöru er fráleitt að áætla að fjárfestar horfi til þeirra í leit sinni að vörn gegn verðbólgu og fallandi gengi hlutabréfa.
_____________________________________________
Nánar er fjallað um málið í Viðskiptablaðinu í dag. Áskrifendur geta lesið blaðið á pdf-formi hér á vefnum. Þeir áskrifendur sem ekki hafa sótt um aðgangsorð til að lesa blaðið á vefnum geta gert það hér .