*

sunnudagur, 22. september 2019
Innlent 9. ágúst 2019 09:29

Meðaltekjurnar 553 þúsund á mánuði

Meðaltal atvinnutekna hækkaði 5,5% á síðasta ári. Hæstar meðaltekjur í Garðabæ, Seltjarnarnesi og Bolungarvík

Ritstjórn
Frá Bolungarvík hefur löngum verið öflugt útræði enda stutt í miðin. Bærinn var fyrsta sveitarfélagið sem ekki var klofið frá umlyggjandi hreppi þegar bærinn fékk kaupstaðarréttindi heldur var Hólshreppur allur gerður að Bolungarvíkurkaupstað.
Haraldur Guðjónsson

Heildartekjur á Íslandi voru um 6,6 milljónir króna að meðaltali eða að jafnaði um 553 þúsund krónur á mánuði á síðasta ári að því er Hagstofan greinir frá. Miðgildi heildartekna var 441 þúsund króna á mánuði og því var helmingur einstaklinga með heildartekjur undir þeirri upphæð og helmingur yfir.

Atvinnutekjur voru um 505 þúsund krónur á mánuði að meðaltali sé horft til þeirra einstaklinga sem voru með atvinnutekjur árið 2018. Það er 5,5% hækkun frá fyrra ári. Miðgildi atvinnutekna var 447 þúsund krónur.

Atvinnutekjur einstaklinga á aldrinum 25 til 74 ára voru að meðaltali 571 þúsund krónur á mánuði árið 2018 og var eitt prósent einstaklinga á þeim aldri með að jafnaði tæplega tvær milljónir króna eða meira í atvinnutekjur á mánuði.

Tekjur einstaklinga byggja á skattframtölum einstaklinga frá 16 ára aldri. Atvinnutekjur innihalda launatekjur og aðrar starfstengdar greiðslur en heildartekjur eru samtala atvinnutekna, fjármagnstekna og annarra tekna sem til dæmis geta verið lífeyris- eða bótagreiðslur.

Bolungarvík með þriðju hæstu meðaltekjurnar

Meðaltal heildartekna árið 2018 var hæst 8,5 milljónir króna á Seltjarnarnesi og 8,4 milljónir króna í Garðabæ, en það voru einu sveitarfélögin þar sem heildartekjur einstaklinga voru að meðaltali yfir 8 milljónir króna.

Sé hins vegar horft til miðgildis voru heildartekjur nokkuð lægri eða rúmlega 6,2 milljónir króna í báðum sveitarfélögunum. Heildartekjur í Bolungarvík voru 7,6 milljónir króna að meðaltali árið 2018, 7,3 milljónir króna í Kjósahreppi og 7,2 milljónir króna í Kópavogi.

Í sjö sveitarfélögum var meðaltal heildartekna undir 5 milljónum króna árið 2018. Lægstar voru heildartekjur í Akrahreppi 4,3 milljónir króna og 4,4 milljónir króna í Húnavatnshreppi.