Marel hefur lokið langtíma fjármögnun með útgáfu á Schuldschein bréfum að fjárhæð 140 milljónir evra, um 19,5 milljarðar íslenskra króna, með föstum og fljótandi vöxtum til fimm og sjö ára.
Félagið hafði áætlað að gefa út skuldabréf fyrir 100 milljónir evra en þar sem umframeftirspurn var eftir bréfunum og hagstæðra markaðsaðstæðna var útgáfan stækkuð í 140 milljónir evra.
Stærstur hluti útgáfunnar var til fimm ára með 110 punkta álagi yfir millibankavöxtum í evrum (EURIBOR) en sjö ára útgáfan var með 130 punkta álag yfir millibankavöxtum í evrum. Útgáfan var seld til fjölbreytts hóps fjárfesta á meginlandi Evrópu og Asíu.
Umsjónaraðilar útboðsins voru ABN AMRO N.V, Bayerische Landesbank og Unicredit Bank AG.
Linda Jónsdóttir, fjármálastjóri Marel segist hæstánægð með áhugann á skuldabréfunum. „Útgáfan endaði í 140 milljónum evra, en umframeftirspurn var eftir bréfunum sem staðfestir trú fjárfesta á traustum rekstri Marel og fjárhagsstyrk. Við erum þakklát fyrir það traust sem fjárfestar sýna með þessum hætti, en með útgáfunni fjölgum við stoðum í langtíma fjármögnun félagsins sem eykur sveiganleika í rekstri og styður við metnaðarfullar áætlanir um framtíðarvöxt og virðisaukningu,“ er haft eftir Lindu.
