Fréttir um tekjuhæstu einstaklinga síðasta árs, byggt á tekjublaði Frjálsrar verslunar, og ungt fólk á ýmsum aldri á uppleið í atvinnulífinu eru áberandi á á lista yfir mest lesnu fréttir Frjálsrar verslunar á árinu. Sérstakt tölublað var gefið út um fólk á uppleið í atvinnulífinu.
1. Guðbjörg tekjuhæsti fasteignasalinn
Lesendur höfðu mikinn áhuga á tekjum fasteignasala sem var nýr flokkur í tekjublaði Frjálsrar verslunar. Guðbjörg G. Sveinbjörnsdóttir , fasteignasali hjá fasteignasölunni Trausta, var tekjuhæst á árinu samkvæmt tekjublaðinu með 2,7 milljónir króna á mánuði.
2. Tíu tekjuhæstu forstjórarnir 2018
Tekjuhæstu forstjórar ársins vöktu talsverða athygli. Jón Björnsson, fyrrverandi forstjóri Festi, var tekjuhæsti forstjóri landsins í fyrra og námu tekjur hans að jafnaði 28,4 milljónum króna á mánuði, samkvæmt álagningarskrám ríkisskattstjóra. Jón innleysti kauprétti á árinu sem skiluðu honum í efsta sæti listans.
Uppfinningamaðurinn Össur Kristinsson fór yfir sviðið í 80 ára afmælisblaði Frjálsrar verslunar. Hann lagði um 5 milljarða króna í nýja bátahönnun og stofnaði annað stoðtækjafélag eftir að hann yfirgaf Össur.
4. Fólk á uppleið II — Elísabet, Eva og Erna
Frjáls verslun fékk valinkunnan hóp sérfræðinga til að tilnefna fólk á lista yfir Íslendinga á uppleið í atvinnulífinu. Meðal þeirra sem rötuðu á listann voru Elísabet Grétarsdóttir hjá tölvuleikjarisanum EA Games, Eva Sóley Guðbjörnsdóttir, fjármálastjóri Icelandair og Erna Björg Sverrisdóttir aðalhagfræðingur Arion banka.
5. Fólk á uppleið IV — Kristrún, Kristinn og Linda
Kristrún Mjöll Frostadóttir aðalhagfræðingur Kviku banka, Kristinn Árni Lár Hróbjartsson stofnandi og ritstjóri nýsköpunarvefsins Northstack og Linda Jónsdóttir fjármálastjóri Marel voru einnig á lista Frjálsrar verslunar yfir fólk á uppleið í atvinnulífinu.