Metfjöldi sótti ráðstefnuna „Best of TechEd & Convergence 2010“ sem haldin var í Reykjavík dagana 26. og 27. janúar.

Alls komu 1.134 gestir sem gerir þetta að fjölmennustu ráðstefnu sem haldin hefur verið í upplýsingatækni hér á landi að því er fram kemur í tilkynningu frá Microsoft á Íslandi. Fyrra metið var sett á sömu ráðstefnu á síðasta ári en þá voru gestir 850 talsins.

Það er Microsoft Íslandi sem stendur fyrir Best of TechEd & Convergence, en þetta er í annað sinn sem ráðstefnan er haldin hér á landi. Blásið var til ráðstefnunnar í fyrsta sinn í janúar á síðasta ári í kjölfar þess að símenntunarferðir íslenskra starfsmanna í upplýsingatæknigeiranum á ráðstefnur erlendis lögðust svo til af í kjölfar banka- og gengishrunsins árið 2008 að sögn Microsoft á Íslandi.

„Á Best of TechEd & Convergence flytur Microsoft Íslandi hingað til lands marga af helstu fyrirlesurunum á tveimur stórum alþjóðlegum ráðstefnum, annars vegar hinni bandarísku TechEd og hins vegar Convergence, sem haldin er í Evrópu,“ segir í tilkynningunni.

!Íslenskum tækniáhugamönnum er boðið að sækja viðburðinn sér að kostnaðarlausu, svo allir sem vilja geti kynnt sér það nýjasta í tækninni óháð fjárhag. Við skipulag ráðstefnunnar í ár vakti athygli að nokkur fjöldi erlendra gesta ferðaðist til landsins til að taka þátt í ráðstefnunni, enda veitir viðburðurinn hér á landi einstakt tækifæri til að fá beint í æð það besta frá tveimur ólíkum alþjóðlegum upplýsingatækniráðstefnum.“

Á ráðstefnunni voru kynntar margar af helstu hugbúnaðarlausnum Microsoft og var til að mynda sýnd í fyrsta sinn íslensk þýðing á stýrikerfinu Windows 7, viðskiptakerfið Microsoft Dynamics C5 2010 var frumsýnt, fjallað um nýjasta netþjón Microsoft, Windows Server 2008 R2, og svo mætti lengi telja.

Þá kemur fram að nýjasta tækni var nýtt við framkvæmd ráðstefnunnar og má til að mynda nefna að skráningarkerfi hennar er íslensk hönnun sem keyrir á tölvuskýinu Windows Azure. Jafnframt voru samfélagsmiðlar nýttir til hins ítrasta á ráðstefnunni og m.a. settur upp Twitter-veggur í fyrsta sinn á ráðstefnu hér á landi. Hann var notaður til samskipta milli ráðstefnugesta og til að beina fyrirspurnum til pallborðs við lok ráðstefnunnar.

Halldór Jörgensson, framkvæmdastjóri Microsoft Íslandi, segir í tilkynningunni að í ljósi þess hve vel Best of TechEd & Convergence hafi verið sótt sé búið að ákveða að halda ráðstefnuna aftur að ári liðnu. Hún sé greinilega orðinn mikilvægur þáttur í símenntun íslensks upplýsingatæknifólks og á meðan erfitt sé að sækja þekkingu með ferðalögum til útlanda verði að halda viðburði sem þessa reglulega hér á landi.

„Ef við höldum rétt á spilunum geta nýsköpun og upplýsingatækni ekki bara hjálpað okkur að auka hagræði í öllum okkar rekstri, heldur einnig orðið einn mikilvægasti þátturinn í verðmætasköpun Íslendinga á komandi árum,“ segir Haraldur í tilkynningunni.

„Ég skynja verulega uppsveiflu í íslenskri upplýsingatækni síðustu mánuðina og vona að þessi viðburður hjálpi til við að halda okkar tæknifólki í fremstu röð í alþjóðlegum samanburði. Móttökurnar hafa að minnsta kosti verið framar okkar vonum og ég tel að við séum búin að stimpla Best of TechEd & Convergence inn sem lykilviðburð í íslenskri upplýsingatækni.“