Arion banki hefur sent frá sér fréttatilkynningu þar sem fram kemur að ákveðið hefur verið að bjóða einstaklingum með erlend íbúðalán hjá bankanum, með veði í fasteign, að greiða mánaðarlega 5.000 kr. af hverri milljón upphaflegs höfuðstóls lánsins á verðlagi við lánveitingu. Í fréttatilkynningunni kemur fram að samkvæmt þessu myndi viðskiptavinur með 13 milljón króna erlent íbúðalán greiða 65 þúsund krónur á mánuði. Með þessu vill Arion banki koma til móts við viðskiptavini sína sem skulda erlend íbúðalán þar til fordæmisgefandi hæstaréttardómar falla um lán bankans. Í ljósi þeirrar óvissu sem nú ríkir vegna erlendra lána hefur Arion banki enn fremur ákveðið að framlengja lausnir sínar vegna erlendra lána um tvo mánuði eða til 1. september 2010. Þá ítrekar bankinn að viðskiptavinir glata ekki betri rétti þó þeir nýti sér úrræði bankans. Bankinn áréttar einnig í fréttatilkynningunni að engar nauðungarsölur á íbúðahúsnæði verða á vegum bankans á þessu ári. Hægt er að sækja um framangreindar breytingar á mánaðarlegum afborgunum erlendra íbúðalána í útibúum bankans og taka þær gildi frá og með næsta gjalddaga.