Frosti Sigurjónsson, formaður efnahags- og viðskiptanefndar segir í samtali við Fréttablaðið að mjög mikilvægt sé að forgangsraða í ríkisfjármálum og ekki sé lengur hægt að ýta vanda ríkisins á undan sér. "Það eru til dæmis einhverjar fjárfestingar sem mega bíða sem hvorki eru gjaldeyrisskapandi né sparandi. Þá verðum við að bíða með þær og leggja áherslu á mikilvægustu innviðina og þau verkefni sem kosta ekki mikinn gjaldeyri en eru atvinnuskapandi eða skapa útflutningsmöguleika eða einhvers konar góða þjónustu fyrir fólkið í landinu. Eins og til dæmis heilbrigðiskerfið," segir Frosti.
Hann segir að stjórnmálamenn ættu að forgangsraða í ríkisfjármálum líkt og heimilin þurfa að gera. "Þú myndir fyrst passa upp á það að halda heilbrigði fjölskyldunnar og gera það sem þarf til þess. Fyrst þarf að borða hollan mat en bíða með utanlandsferðir og greiða niður skuldir. Ekki kaupa fellihýsi og safna skuldahala," segir Frosti í samtali við Fréttablaðið. Einna mikilvægast sé þó að greiða niður skuldir að hans sögn. "Það er dýrt að skulda og það á ekki að taka meiri lán. Svona þurfum við líka að hugsa í ríkisrekstrinum," segir Frosti.
Ríkisreikningur kom út í vikunni. Niðurstaðan er sú að 36 milljarða króna halli var á ríkissjóði árið 2012, sem var 10 milljarða króna lakari útkoma en ráðgert var við gerð fjáraukalaga.
