Skiptum á félaginu Tæki, tól og byggingavörur, sem áður hét MEST ehf., er lokið, en alls námu kröfur í þrotabúið rúmum 3.368 milljónum króna, samkvæmt tilkynningu í Lögbirtingablaðinu.
Skiptum var lokið á grundvelli frumvarps til úthlutunar og kemur því ekki fram í tilkynningunni hve mikið fékkst upp í lýstar kröfur, en skiptastjóri búsins var Steinunn Guðbjartsdóttir, formaður slitastjórnar Glitnis.
Síðla sumars 2008 var greint frá því að fyrirtækinu hefði verið skipt í tvennt. Steypustöðin var aðskilin frá öðrum rekstri og starfaði í hálft ár undir nafninu Steypustöðin MEST. Í janúar 2009 var MEST-hluta nafnsins sleppt og Steypustöðin tók upp sitt gamla nafn. Upprunalega fyrirtækið var tekið til gjaldþrotaskipta þann 30. júlí 2008, en viku fyrr hafði verið skipt um nafn á fyrirtækinu og nafnið Tæki, tól og byggingavörur tekið upp í staðinn.