Indverskur eigandi skartgripaframleiðandans Nirav Modi hefur sótt um pólitískt hæli í London í kjölfar ásakana um 2 milljarða dollara svik í Indlandi. Eigandinn, sem heitir Nirav Modi rétt eins og fyrirtækið, hefur verið á flótta undan indverskum yfirvöldum síðan í febrúar, vegna ásakana um að hann hafi svikið 2 milljarða dollara út úr Punjab National Bank. Greint er frá þessu á vef BBC.

Ýmsar Hollywood og Bollywood stjörnur hafa borið skartgripi Modi í gegnum tíðina. Þar má meðal annars nenfna Kate Winslet og Naomi Watts. Skartgripaframleiðandinn er meðal annars með verslanir í London, New York og Hong Kong.

Verslunum Modi í Indlandi hefur verið lokað og yfirvöld hafa lagt hald á eignir hans, þar á meðal bankareikninga og lúxusbifreiðar í hans eigu.

Modi hefur hagnast vel á skartgripasölunni í gegnum tíðina og til marks um það er hann samkvæmt Forbes einn ríkasti maður Indlands, en persónulegar eignir hans eru sagðar nema 1,75 milljörðum dollara.