*

laugardagur, 4. apríl 2020
Innlent 26. febrúar 2020 14:39

Minnka hættu á greiðslusvikum

Origo semur við CSIS Security Group, sem er eitt þekktasta fyrirtæki heims í öryggislausnum.

Ritstjórn
Jan Kaastrup, frá CSIS Security Group, Anton Már Egilsson frá Origo og Henrik Andersen frá CSIS Security Group.
Aðsend mynd

Öryggislausn sem lágmarkar áhættu á svikapóstum er meðal þess sem Origo getur boðið viðskiptavinum í kjölfar samstarfssamning við CSIS Security Group, sem er eitt þekktasta fyrirtæki heims í öryggislausnum. Samstarfið gerir Origo kleift að efla lausnir og ráðgjöf í öryggismálum. Greint er frá þessu í fréttatilkynningu.

„Umfang netglæpa hefur aukist verulega og hefur Ísland ekki farið varhluta af þeirri þróun þar sem glæpamenn nýta aukið aðgengi til að byggja upp trúverðug samskipti við íslensk fyrirtæki með það að markmiði að svíkja þau um fé og upplýsingar. Talið er að á síðasta ári hafi Íslendingar tapað allt að einum og hálf­um millj­arði króna með þess­um hætti,“ segir Anton Már Egilsson forstöðumaður skýja- og öryggislausna hjá Origo í tilkynningunni.

Hann segir að með samstarfi við CSIS geti Origo eflt varnir fyrir viðskiptavini og dregið úr áhættu á að tölvuþrjótar komist upp með að svíkja fé út úr þeim.

„Tölvuþrjótar geta komast yfir upplýsingar um reikninga eða breytt póstsamskiptum svo að þeir líti út fyrir að koma frá öðrum aðilum, t.d. innan fyrirtækisins. Við þessi póstsamskipti eru hengd greiðslufyrirmæli þar sem beðið er um millifærslu á erlenda reikninga. Slíkur gjörningur getur litið út fyrir að vera eðlilegur póstur frá yfirmanni sem biður viðkomandi starfsmann um að greiða reikninga. Skilaboðin koma þó ekki frá réttum aðila heldur tölvuþrjótum,“ bætir hann við.

Hann segir að Origo geti nú, með samstarfi með CSIS Security Group, greint hvern póst fyrir sig og varað rétta aðila við ef óeðlilegir hlutir eigi sér stað.

„Það er möguleiki að stöðva svik áður en í óefni er komið og fé glatast. Við getum í langflestum tilvikum séð hvort búið er að eiga við skjöl í póstum þar sem greiðslu er krafist. Við getum séð hvar upprunalega skjalið er búið til og hvort því hafi verið breytt. Við greinum auk þess reikningsnúmerin. Ef ákveðnu reikningsnúmeri hefur verið beitt í svikamáli áður þá komumst við að því með aðstoð lausna CSIS. Lausnin er frábær viðbót við núverandi vöruframboð sem tekur á flestum öryggisþáttum.“