Keflavíkurflugvöllur hefur nú lokið fyrsta skrefi í kolefnisvottun Alþjóðasamtaka flugvalla (Airports Council International), en verkefnið gengur út á að minnka umhverfisáhrif flugvalla. Þetta kemur fram í fréttatilkynningu frá Isavia.
Verkefnið skiptist í fjögur stig; kortlagningu kolefnisspors, markmiðasetningu og minnkun kolefnislosunar, minnkun kolefnislosunar í samstarfi við aðra rekstraraðila á flugvellinum og lokastigið er kolefnisjöfnun flugvallarins.
Fyrsta stigið felst í greiningu á umhverfisáhrifum reksturs flugvallarins á nærumhverfið og kortlagningu á kolefnisspori starfseminnar. Þessi vinna hefur tekið um fimm mánuði en hún er grundvöllur að því að sýna fram á árangur í minnkun kolefnislosunar á hvern farþega í vottunarferlinu.
Alls hafa 156 flugvellir um allan heim fengið vottun ACA, en um þá fara 32,6% flugumferðar í heiminum. Keflavíkurflugvöllur er á meðal 106 vottaðra flugvalla í Evrópu.