Lánshæfismatsfyrirtækið Moody´s hefur tilkynnt að það lækkaði lánshæfismat sex þýskra banka auk þýska útbús UniCredit Spa sem er ítalskur banki og þriggja banka í Austurríki. Á meðal þýsku bankanna er Commerzbank, sem er næst stærsti bankinn í þar í landi. Mat Moody´s á bankanum var lækkað um eitt þrep, niður í A3 eftir því sem fram kemur hjá Bloomberg fréttaveitunni. Mat á Deutsche Bank, stærsta banka Þýskalands, verður lokið við síðar samkvæmt fréttinni.
Helstu ástæðurnar fyrir matslækkunum þýsku bankanna eru sagðar auknar líkur á áföllum vegna skuldakreppunnar í Evrópu til viðbótar við að bankarnir hafa takmarkað svigrúm til að taka sig tap. Hvað austurrísku bankana varðar segir Moody´s að þeir séu viðkvæmir fyrir þeim aðstæðum sem eru á svæðum þar sem kjarnastarfsemi þeirra fer fram. Aukin áhætta vegna skuldakreppunnar í Evrópu er einnig sögð hafa áhrif á lánshæfismatið.
