Skuldatryggingarálag ríkissjóðs til fimm ára hefur hækkað um 260 punkt það sem af er ári og er nú álíka hátt og um mitt síðasta ár (673 punktar).
Um þetta er fjallað í Morgunkorni Íslandsbanka en þar segir að hækkun álagsins endurspegli væntanlega meðal annars vaxandi áhyggjur af því að ríkissjóður kunni að lenda í greiðslufalli á næstu árum.
„Í því sambandi er athyglisvert að þótt álagið til 5 ára, sem oftast er notað til samanburðar, sé þannig svipað og í júlí í fyrra er skuldatryggingarálag á ríkissjóð til eins árs (910 punktar) mun hærra en þá var, og meira í líkingu við stöðuna fyrir ári síðan. Fjárfestar telja þannig töluverðar líkur á að til greiðslufalls kunni að koma innan árs,“ segir í Morgunkorni Íslandsbanka.
Þar segir þó að ef litið sé yfir erlendar skuldbindingar ríkissjóðs megi segja að erfitt sé að rökstyðja slíka bölsýni hvað varðar næstu 12 mánuði. Samkvæmt Markaðsupplýsingum Lánamála ríkisins námu erlendar skuldir ríkissjóðs alls jafnvirði 357 milljarða króna um síðustu áramót. Af þeim skuldum er ekkert á lokagjalddaga á þessu ári og þarf ríkissjóður því aðeins að standa skil á vaxtagjöldum, sem gróflega má áætla að séu upp undir 20 milljarðar króna að sögn Greiningar Íslandsbanka.
Árið 2011 eru lokagjalddagar á tveimur stórum erlendum skuldbindingum ríkissjóðs. Annars vegar er þar um að ræða sambankalán að fjárhæð 300 milljónir evra, sem greiða á í september og hins vegar skuldabréf að fjárhæð 1 milljarður evra sem fellur á gjalddaga í desember. Auk heldur þarf vitaskuld að greiða vexti af þessum og öðrum skuldbindingum.
Greining Íslandsbanka segir að ef ekki fáist frekara lánsfé inn í gjaldeyrisforða Seðlabankans gæti hann því verið orðinn nokkuð smár eftir þessar greiðslur. Það sé hins vegar tæpast fyrr en í apríl 2012, þegar skuldabréf að fjárhæð 250 milljónir evra er á gjalddaga, sem gjaldeyrisforðinn kynni að verða þurrausinn, jafnvel þótt ekki takist að afla neins frekari gjaldeyris inn í hann.
