Áhugi íslenskra fjárfesta á löngum óverðtryggðum ríkisskuldabréfum hefur síst dvínað þrátt fyrir aukna óvissu um þróun skammtímavaxta og efnahagsmála næsta kastið.

Um þetta er fjallað í Morgunkorni Íslandsbanka í dag en Greining Íslandsbanka segir mikla eftirspurn eftir lengsta ríkisbréfaflokknum, RIKB25, í fyrsta ríkisbréfaútboði Lánamála ríkisins þetta árið, sem haldið var s.l. föstudag, vitna til um það.

Alls bárust tilboð að fjárhæð 10,2 milljarða króna í flokkinn. Af þeim var tilboðum fyrir 8,3 milljarða tekið á 8,07% ávöxtunarkröfu. Lífeyrissjóðir og aðrir innlendir stofnanafjárfestar hafa verið stórtækir kaupendur RIKB25 í undanförnum útboðum og gerir Greining Íslandsbanka ráð fyrir að sú hafi einnig verið raunin nú.

Þá kemur fram að mun minni áhugi hafi verið á hinum flokknum sem í boði var, RIKB11. Aðeins bárust tilboð fyrir 4,3 milljarða króna og var þeim öllum hafnað. Þetta er annað útboðið í röð þar sem fallið er frá sölu RIKB11 vegna lítillar spurnar.

„Teljum við þessar dræmu undirtektir til marks um að erlendir fjárfestar hafi ekki haft áhuga á þátttöku í útboðinu að þessu sinni,“ segir í Morgunkorni.

„Útlendingar virðast mun áhugasamari um ríkisvíxla en stutt ríkisbréf þessa dagana. Teljum við það hafa átt sinn þátt í breyttum áherslum í útgáfu ríkisskuldabréfa þetta árið þar sem ákveðið var að bæta í útgáfu ríkisvíxla fremur en draga úr henni líkt og áætlanir í fyrra gerðu ráð fyrir. Gæti orðið torsótt að byggja upp þennan flokk næsta kastið, en hugsanlega léttist sá róður eftir því sem líður á árið og líftími hans styttist.“

Óverðtryggðir langtímavextir komnir til að vera

Þrátt fyrir að ekki hafi verið seld RIKB11-bréf að þessu sinni er það mat Greiningar Íslandsbanka að ríkissjóður megi vel una við niðurstöðu föstudagsins. Eftir útboðið eru ríflega 64 milljarða króna útistandandi í RIKB25-flokknum auk verðbréfalána og er hann því orðinn sambærilegur flestum hinna ríkisbréfaflokkanna að stærð þrátt fyrir að hafa fyrst litið dagsins ljós fyrir hálfu ári síðan.

„Segja má að það hafi verið nokkuð kjarkað af ríkissjóði að ráðast í uppbyggingu á óverðtryggðum skuldabréfaflokki með svo langan líftíma í því mikla óvissuástandi sem ríkti síðastliðið sumar, og hefur raunar að miklu leyti verið við lýði síðan,“ segir í Morgunkorni.

„Spurn eftir bréfunum hefur hins vegar reynst veruleg, sér í lagi hjá íslenskum langtímafjárfestum. Teljum við til að mynda að flokkurinn fari nú nærri því að fylla hálft annað prósent af eignasafni lífeyrissjóðanna, sem má telja harla góðan árangur fyrir ríkissjóð í ljósi þess að margir töldu til skamms tíma illmögulegt að byggja upp óverðtryggðan langtíma vaxtaferil  á íslenskum skuldabréfamarkaði. Uppbygging slíks ferils er raunar forsenda þess að hægt sé að bjóða íslenskum fyrirtækjum og einstaklingum upp á langtíma óverðtryggð lán á föstum vöxtum, til að mynda íbúðalán.“