Fjármálaeftirlitið vildi vinna upplýsingar úr sérstöku tilkynningarskyldukerfi, sem hafði verið tekið upp árið 2007, eftir kennitölum. Eftir að Samtök fjármálafyrirtækja og Persónuvernd höfðu lagst gegn þeim áformum gaf Viðskiptaráðuneytið út reglugerð sem kom í veg fyrir þessi áform FME.
Í fréttum Ríkisútvarpsins hefur verið fjallað um ábyrgð eftirlitsaðila, eins og Kauphallarinnar og Fjármálaeftirlitsins, á því að koma í veg fyrir meinta markaðsmisnotkun stóru bankanna þriggja fyrir hrun. Páll Harðarson, forstjóri Kauphallarinnar, vísaði á FME í fréttum Sjónvarpsins í gær og að eftirlitið hefði ekki notað sérstakt tilkynningarskyldukerfi.
Í hádegisfréttum Útvarpsins í dag hafnaði Jónas Fr. Jónsson, fyrrverandi forstjóri Fjármálaeftirlitsins, þessum ásökununum.
Í samtali við Rúv sagði Jónas: „Í nóvember 2007 var tekið upp ákveðið tilkynningaskyldukerfi. Ofan á það þurfti að byggja úrvinnslukerfi sem vann úr öllum upplýsingunum og við lögðum mikla áherslu á það þá að geta unnið úr því kerfi eftir kennitölum. Samtök fjármálafyrirtækja og Persónuvernd lögðust gegn því og niðurstaðan kom ekki fyrr en í febrúar 2008 þegar viðskiptaráðuneytið gaf úr reglugerð sem veitti Fjármálaeftirlitinu ekki heimild til að leita eftir kennitölum,“ sagði Jónas við Rúv.
Aðspurður sagði hann að forstjóri Kauphallarinnar ætti að líta sér nær. Allir hefðu getað gert betur.