Fjölgun millilandafarþega um Akureyrarflugvöll hefur verið mikil undanfarin ár að því er Markaðsstofa Norðurlands bendir á uppúr tölum Isavia. Samkvæmt þeim nam fjölgunin árið 2017 24% frá fyrra ári, árið 2018 var fjölgunin enn meiri eða 70% miðað við fyrra ár og árið 2019 nam fjölgunin 38% miðað við árið á undan.
Nú styttist svo í að ferðamenn á vegum hollensku ferðaskrifstofunnar Voigt Travel komi í fyrstu vetrarferð ársins til Norðurlands, en alls verða ferðirnar 8 talsins frá 14. febrúar til 9. mars. Sem fyrr er það flugfélagið Transavia sem annast flugið.
Fjölgun í heimsóknum erlendra ferðamanna yfir vetrartímann er að mati markaðsstofunnar kærkomin innspýting fyrir ferðaþjónustuna á svæðinu, sem segir þennan stöðuga og mikla vöxt merki um þann árangur sem hafi náðst í markaðssetningu áfangastaðarins Norðurlands.
Jafnframt undirstriki hann mikilvægi þess að ráðist verði í uppbyggingu á Akureyrarflugvelli til framtíðar. Auk þess er bent á að flugferðir Voigt Travel séu tækifæri fyrir íbúa Norðurlands að skreppa til Amsterdam. Ferðaskrifstofa Akureyrar annast sölu á ferðum frá Akureyri til Amsterdam og segir markaðsstofan að þessu framtaki sé vel tekið af heimafólki.
