*

þriðjudagur, 22. september 2020
Innlent 5. mars 2020 14:34

Nærri 5.200 milljarðar í lífeyrissjóðunum

Aldrei hærra hlutfall eigna sjóðanna erlendis, eða um þriðjungur. Ávöxtun samtryggingarsjóða talin 12% árið 2019.

Ritstjórn
Á efri árum er gott að eiga vísa sjóði að.
Haraldur Guðjónsson

Við árslok 2019 námu heildareignir lífeyrissjóðanna 5.180 milljörðum íslenskra króna, eða nærri 5,2 billjónum króna, að því er Fjármálaeftirlit Seðlabanka Íslands hefur gefið út.

Heildareignir fjögurra stærstu sjóðanna, LSR, Lífeyrissjóðs verslunarmanna, Gildis og Birtu námu nærri 3 billjónum króna, eða 3.000 milljörðum króna, eða sem samsvarar um 57% af lífeyrissparnaði landsmanna. Jókst hlutfall þeirra um 0,4 prósentustig á árinu.

Á liðnu ári jókst lífeyrissparnaður landsmanna umtalsvert eða um 752 milljarða króna, sem samsvarar 17% aukningu, en þá er miðað við bæði í samtryggingu og í séreign.

Þriðjungur í erlendum eignum

Þar af nam aukning erlendra eigna 455 milljörðum króna, en í lok árs námu þær 1.672 milljörðum króna, sem samsvarar nærri 1/3 af heildareignum bæði samtryggingar og séreignasjóðanna, og hefur sú hlutdeild aldrei verið hærri.

Um 1.363 milljarðar af erlendu eignunum eru í verðbréfasjóðum, en um 229 milljarðar í hlutabréfum, en afkoma erlendu bréfanna er sögð hafa verið mjög hagfelld á árinu. Þannig hækkaði vísitala MSCI um 27% á árinu.

Í samtryggingarhlutanum voru við árslok um 4.439 milljarðar króna, og var þar aukning um 642 milljarða króna, en bráðabirgðatölur um raunávöxtun þessa hluta gefa vísbendingu um 12% ávöxtun á árinu, sem er sú mesta síðustu tvo áratugina, utan ársins 2005, þegar hún var 13,5%.

Heildareignir séreignasparnaðarins sem er í vörslu lífeyrissjóða og annarra innlendra vörsluaðila námu 742 milljörðum króna í árslok eftir 112 milljarða króna aukningu á árinu eða sem samsvarar 18%.